O Consello da Xunta aprobou hoxe a sinatura dun convenio de colaboración entre o Servizo Galego de Saúde (Sergas) e o Concello de Vilanova de Arousa para acometer unha reforma integral no centro de saúde deste municipio. A actuación, que suporá un investimento de 303.921 euros, será financiada ao 50% por cada unha das administracións implicadas.
Esta iniciativa enmárcase na aposta da Xunta por mellorar e modernizar as infraestruturas sanitarias galegas. As obras buscan optimizar a eficiencia enerxética do centro e solucionar os problemas de filtracións na cuberta.
O proxecto de reforma inclúe a renovación completa da envolvente do edificio. Substituiranse as carpinterías exteriores por cerramentos de aluminio con dobre acristalamento e renovarase a cuberta, incluíndo o levantamento e impermeabilización da mesma. Tamén se actuará sobre as cubertas planas e transitables, instalando un novo solado apto para o paso peonil e tratando puntos singulares.
As melloras exteriores completaranse coa substitución integral do sistema de evacuación de augas, coa instalación de novas canles e baixantes. No interior, prevese o revestimento e alicatado con azulexos en diferentes zonas, o remate dos ocos das novas carpinterías e o pintado xeral dos espazos.
Esta intervención permitirá modernizar as instalacións, mellorar o confort de pacientes e profesionais e prolongar a vida útil do edificio. As obras planificaranse para compatibilizar a continuidade da actividade asistencial e minimizar as molestias durante a súa execución.
O acordo terá vixencia desde a súa sinatura ata o 29 de decembro de 2027.
