O concerto, a única actuación prevista do cantante en Galicia para este verán, incluíu éxitos como 'Prendio', 'Goteras' ou 'Alocao'. A velada tivo lugar no Buuum! Fest, unha das propostas do festival que se celebra en Sanxenxo durante os meses de xullo e agosto.
Inicialmente anunciado como unha data extra para o festival Son do Mar en Meaño, o concerto foi acollido finalmente pola programación do Costa Feira tras a cancelación unilateral do primeiro. O cartel completouse coas actuacións de Lauta e Reality, ademais de varios DJ de referencia do panorama urbano e latino nacional.
A noite comezou coas propostas de Romántico Latino, que achegou ritmos de reguetón, e os DJ pontevedreses Borja Solla e Aitor Alfonsín. Tras a actuación de Omar Montes, que se estendeu por máis dunha hora, a sesión de Djow puxo o broche final á xornada.
A programación do Costa Feira continuará o vindeiro martes co festival Electrolatino, que contará coa presenza de Juan Magán. O festival estenderase ata o 22 de agosto, con concertos de artistas como Nicky Jam, Rusowsky, Loquillo ou Taburete.
Dentro de Bulla, o segundo espazo de concertos do festival, as sesións nocturnas de sons urbanos e latinos prolongaranse ata a mesma data. Tamén haberá propostas musicais nocturnas con Xavibo e Aaron Sevilla, Casi Mestizo, Electrolatino, Tardeo Pica Pop e Molan los 2000.
