Paz rexeitou as declaracións do alcalde, Luis Arosa, sobre o saneamento das contas municipais, argumentando que a suposta boa saúde financeira se sustenta nunha recadación de impostos excesiva. Segundo o concelleiro popular, a realidade que perciben os veciños difire moito da versión oficial, que considera “medias verdades”.
“"É sinxelo ter o Concello máis ou menos saneado, que tampouco están as contas para botar foguetes e proba delo é que o goberno sempre di que non ten cartos, cando os veciños da Illa sofren a presión fiscal máis alta de entre todos os concellos da provincia de ata 10.000 habitantes e ademais sen investir axeitadamente esa voraz recadación de impostos, xa que hai que lembrar que carecemos de moitos servizos básicos, comezando polo pavillón polo que levamos agardando máis de 25 anos."
O vicevoceiro subliñou que os residentes da Illa de Arousa pagan unha media de 577,9 euros anuais en tributos municipais, unha cifra que cualificou de “récord” entre os concellos de ata 10.000 habitantes. A pesar desta recadación, Paz lamenta a falta de infraestruturas esenciais, como un pavillón deportivo, polo que os veciños levan agardando máis de 25 anos.
Ademais, criticou a política económica do goberno local, formado por PSOE e BNG, que, segundo el, se basea nun incremento constante de impostos e taxas, cun aumento do 14% no último ano. Paz tamén reprochou a comparación co municipio de Vilanova, que conta con cinco pavillóns deportivos, mentres que a Illa de Arousa non dispón de ningún.
