As propostas que saíron adiante foron a creación de formación da familia de hostalería e turismo, a realización de medicións de gas radón nos edificios públicos municipais, a instalación dun sistema de protección no tramo da estrada do Valado e a construción dunha residencia pública.
As mocións presentadas polo edil non adscrito sobre o cableado eléctrico e o Pavillón Municipal de Beluso foron desbotadas. No caso do cableado, o goberno local argumentou que as compañías eléctricas non teñen obriga de soterralo segundo a normativa estatal, aínda que se está en conversa con Naturgy para o soterramento con motivo de obras na rúa Pazos Fontenla.
Respecto ao Pavillón Municipal de Beluso, a moción instaba a defender xudicialmente a non devolución de 700.000 euros de subvención da Xunta. O goberno local mantén a postura de esperar que a Xunta acepte as alegacións, xa que a reforma foi necesaria e hoxe é gozada polos clubs e a veciñanza.
A moción sobre formación en hostalaría, explicada pola concelleira Silvia Carballo, busca alternativas formativas neste sector clave para a vila e xa se solicitou unha xuntanza coa Xefatura Territorial de Educación da Xunta de Galicia.
A proposta do PP sobre o gas radón foi modificada polo edil non adscrito para incluír todos os edificios, e o voceiro do BNG, Xosé Leal, sinalou a adhesión a un convenio coa Universidade de Vigo.
A moción sobre a protección na estrada do Valado, presentada tamén polo PP, foi votada favorablemente polo concelleiro de mantemento de viais, Celso Dopazo, quen anunciou traballos para ampliar a estrada e facer unha varanda.
A última moción, que instaba á Xunta a construír unha residencia pública en Bueu, contou co voto favorable de todos os grupos.
