A resolución da Consellería de Medio Ambiente e Cambio Climático non prevé impactos significativos sobre a contorna, sempre que se cumpran os condicionantes fixados no informe ambiental e na documentación avaliada. A iniciativa, localizada na parroquia de Castrelo, implicará a eliminación do estrato arbóreo, a preparación do solo, a instalación de sistemas de condución con pedra granítica e arame, e o posterior plantío das vides.
O informe de impacto ambiental (IIA), publicado hoxe no Diario Oficial de Galicia, conclúe que non son previsibles efectos adversos significativos se se respectan as condicións establecidas. O procedemento de avaliación de impacto ambiental simplificada non recibiu achegas do público en xeral, aínda que se consultaron oito organismos interesados.
Froito destas consultas, engadíronse condicionantes específicos en relación coa protección da atmosfera, poboación, saúde, augas, solo, infraestruturas, patrimonio natural e cultural, xestión de residuos e integración paisaxística. A resolución foi remitida á Dirección Xeral de Gandaría, Agricultura e Industrias Agroalimentarias.
O proxecto prevé unha xestión sustentable, evitando labranzas profundas, empregando cubertas vexetais e realizando un control biolóxico de pragas para minimizar o uso de agroquímicos.
