A programación inclúe catro obradoiros adaptados por idades, con propostas pensadas para fomentar un lecer activo, seguro e diferente, reflexionar sobre os hábitos de consumo e aprender a tomar decisións máis conscientes tamén no ámbito dixital.
Baixo o título 'Xogueteando: un lecer diferente!', o obradoiro para nenos de 3 a 6 anos (de 10.00 a 11.00 h) empregará xogos alternativos e colaborativos para descubrir novas formas de ocio. A continuación, a 'Xincana do consumo responsable', dirixida a rapaces de 7 a 12 anos (de 11.00 a 12.00 h), achegará o consumo responsable, sostible e consciente cunha proba de retos dinámicos.
Posteriormente, os mozos de 13 a 14 anos poderán converterse en 'Publicistas por un día!' (de 12.00 a 13.00 h), aprendendo a mirar a publicidade con sentido crítico. Finalmente, a xornada pecharase co obradoiro 'O consumo na rede', para mozos de 15 a 17 anos (de 13.00 a 14.00 h), centrado no consumo seguro e responsable en liña e no uso crítico dos contornos dixitais.
A actividade terá lugar no Centro Social de Cangas o 16 de xullo. A participación está limitada a un máximo de 20 persoas por obradoiro e o acceso será por estrita orde de chegada.
