O Concello de Marín sacou a licitación un proxecto destinado a mellorar as instalacións da Biblioteca Pública Vidal Pazos. A iniciativa busca incrementar o confort dos usuarios e a eficiencia enerxética do edificio, recoñecendo a súa importancia como infraestrutura cultural e de estudo para a localidade.
A licitación, publicada na Plataforma de Contratación do Sector Público, conta cun orzamento de 152.588,49 euros. As empresas interesadas terán de prazo ata o próximo 9 de xullo para presentar as súas ofertas.
As actuacións previstas no proxecto inclúen a mellora da envolvente térmica do inmoble, a substitución do sistema de climatización actual por un de aerotermia, e a instalación dun novo sistema de ventilación con recuperación de calor. Tamén se revisarán as condicións de salubridade do aire interior e renovarase completamente a iluminación, que pasará a ser tipo LED.
