Poderán participar na convocatoria as persoas físicas ou xurídicas que sexan titulares dun negocio de hostalaría —bar, restaurante, cafetería, pub ou similar—, que estea aberto ao público, legalmente autorizado e en funcionamento. Cada persoa ou entidade solicitante poderá optar unicamente á explotación dunha carpa.
No caso de que o número de solicitudes supere as prazas dispoñibles, a adxudicación realizarase mediante un sorteo público. Terán preferencia os establecementos de hostalaría con local aberto durante todo o ano no termo municipal de Cangas, excluídos os chiringuitos e os negocios estacionais. Se despois deste proceso quedasen carpas vacantes, realizarase un segundo sorteo entre o resto dos establecementos admitidos. A data e a hora deste segundo sorteo anunciaranse previamente na web municipal.
O prazo para presentar as solicitudes será de sete días hábiles a partir da publicación desta convocatoria, e rematará ás 14.00 horas do último día. As solicitudes, que deberán estar dirixidas á Alcaldía, poderán presentarse de forma presencial no Rexistro Xeral do Concello, de luns a venres, en horario de 9.30 a 13.30 horas, ou a través da sede electrónica do concello.
Xunto coa solicitude oficial, será necesario achegar a documentación requirida no Anexo I das bases. Esta documentación inclúe o NIF ou CIF, certificados de estar ao corrente das obrigas tributarias e coa Seguridade Social, un xustificante de non ter débedas pendentes co Concello, a licenza de apertura do establecemento e a alta no epígrafe correspondente do Imposto de Actividades Económicas (IAE).
As persoas que resulten adxudicatarias deberán aboar un canon de 1.000 euros. Este pago deberá realizarse no prazo de tres días hábiles desde a notificación da autorización.
As bases completas da convocatoria e o modelo oficial de solicitude están dispoñibles para a súa consulta no documento adxunto a esta publicación.
