A Consellería do Mar, a través de Portos de Galicia, asumirá a reparación da cuberta da nave de deportes náuticos de Cangas de Morrazo. A presidenta do ente público, Natalia Botana, comunicou esta decisión á alcaldesa do municipio nunha reunión celebrada esta mañá na sede do organismo.
Botana explicou que a achega financeira de Portos de Galicia responde ás necesidades persistentes dos deportistas, a pesar de que o Concello anunciara meses atrás unha reforma integral da nave. Para levar a cabo esta inversión, Portos de Galicia e o Concello de Cangas de Morrazo, titular da explotación do edificio, asinarán un convenio de colaboración.
Ademais, Natalia Botana informou tamén da previsión de reparar antes de final de ano o paseo situado na parte traseira dos departamentos do porto cangués. Esta actuación enmárcase dentro do contrato de mantemento que Portos de Galicia ten vixente para a conservación das instalacións nos 122 portos de titularidade autonómica.
