A Concellería de Deportes impulsou esta convocatoria co obxectivo de fortalecer o deporte base, apoiar a participación en competicións e aliviar os gastos das entidades deportivas e das familias. A alcaldesa, Nava Castro, destacou que "o deporte é moito máis que competición. É saúde, educación, convivencia, esforzo e valores". Subliñou a importancia de apoiar o talento local e o labor dos clubs e familias.
O concelleiro de Deportes, Nico Rodríguez, puxo en valor o rigor e o alcance da convocatoria, baseada en criterios técnicos, obxectivos e transparentes para que as axudas chegasen de maneira xusta a todas as disciplinas. Estas axudas permitirán financiar gastos correntes da tempada 2025/2026 e consolidar Ponteareas como unha vila activa.
As axudas distribúense en tres liñas: a primeira, que concentra o groso da partida, beneficia a 25 clubs e entidades de diversas disciplinas como fútbol, baloncesto, natación ou artes marciais. A segunda liña apoia a 49 deportistas individuais na súa traxectoria e participación en competicións.
A terceira liña está dirixida a 17 deportistas de motor, apoiando especificamente o automobilismo e o motociclismo. Estas subvencións cobren gastos como licenzas federativas, desprazamentos, aloxamento, arbitraxes, cotas federativas, persoal técnico, adestradores e alugueiro de instalacións.
A alcaldesa reiterou o compromiso municipal de "estar á altura dese compromiso, apoiar o seu traballo e seguir construíndo unha Ponteareas con máis oportunidades para practicar deporte". O concelleiro engadiu que o obxectivo é que "todas as disciplinas teñan oportunidades e que tanto os clubs como os deportistas individuais sintan que o Concello está ao seu lado".
