Dende a Área Sanitaria de Vigo informouse que a Consellería de Sanidade promoveu medicións de gas radón no Centro de Saúde de Ponteareas, como parte das actuacións de control e prevención en edificios sanitarios.
Tras coñecer os resultados, constituíuse un grupo de traballo que, seguindo o principio de máxima precaución, decidiu o peche temporal da planta soto do centro ao detectarse concentracións de gas radón superiores ao nivel de referencia establecido no Real Decreto 1029/2022.
Para garantir a seguridade e a continuidade da asistencia, realizouse unha reorganización temporal dos espazos. A psicóloga da Unidade de Saúde Mental trasladarase á Unidade de Atención Primaria das Neves, mentres que os dous psiquiatras, a enfermeira e a administrativa prestarán asistencia no propio Centro de Saúde de Ponteareas, onde se acondicionou unha nova consulta.
A actividade de pediatría foi reorganizada aproveitando consultas dispoñibles durante o verán, e as sesións de educación maternal desprazáronse a unha sala multiusos municipal.
Os resultados das medicións remitiranse á Xefatura de Servizo e tamén estarán á disposición dos profesionais e delegados de prevención. Paralelamente, trabállase na implantación de actuacións técnicas para reducir os niveis de radón, que serán avaliadas con novas medicións.
Ademais, a Xunta de Galicia continúa impulsando a construción dun novo Centro de Saúde en Ponteareas, nunha parcela de 5.713 metros cadrados no lugar do Barral, que substituirá o actual edificio e ofrecerá instalacións modernas.
