O Concello de Ponteareas mobilizou á veciñanza cunha campaña informativa fronte á casa consistorial para repartir de balde material de limpeza ás persoas que acudiron cos seus animais. A iniciativa busca concienciar sobre a sucidade nas fachadas e rúas antes de aplicar as sancións da nova ordenanza de civismo.
Na xornada, entregáronse máis de 300 botellas para auga xabonosa e portabolsas para a recollida de excrementos, xunto con información sobre a nova ordenanza que entrará en vigor o vindeiro día 18. A repartición realizouse de balde na entrada da casa consistorial e dirixiuse aos residentes que acudiron acompañados dos seus animais ou que acreditaron telos. Na entrega estiveron presentes a alcaldesa, Nava Castro, a concelleira de Medio Ambiente, Silvia Fernández, e técnicas de Medio Ambiente de FCC, Susana Terrón e Patricia Soutullo.
Esta medida a pé de rúa responde ás continuas queixas cidadás pola sucidade acumulada nas vías urbanas. A concelleira de Medioambiente, Silvia Fernández, destacou que o obxectivo é “axudar e concienciar aos veciños eliminar as manchas de orina nas fachadas comerciais e manter limpas as beirarrúas e portais”, subliñando a prioridade do goberno en fomentar a convivencia e a responsabilidade compartida.
A repartición apoia a nova ordenanza reguladora de civismo, aprobada no pleno, que busca mellorar o ornato público e a salubridade. A normativa, que entra en vigor o 18 de setembro, contempla sancións, aínda que Silvia Fernández remarcou que “non se trata de multar a ninguén, senón de que teñamos todos coidado de ter o noso pobo limpo”.
A alcaldesa, Nava Castro, destacou o compromiso dos propietarios de animais de compañía e sinalou que a acción recolle a esencia do municipio. "O noso obxectivo prioritario é avanzar xuntos cara a un modelo de progreso que estea baseado estritamente na convivencia cidadá e na responsabilidade compartida", manifestou, engadindo que "un pobo máis limpo, saudable e respectuoso co espazo público constrúese co esforzo diario de toda a veciñanza".
O Concello lembra que as obrigas esenciais durante os paseos inclúen recoller inmediatamente os excrementos, limpar os ouriños con auga xabonosa e levar sempre medios de limpeza. Non recoller os excrementos constitúe unha infracción leve penalizada con sancións a partir de 100 euros.
Ademais, a nova normativa introduce pautas para os arenais fluviais entre o 1 de xuño e o 30 de setembro. Durante o verán, as mascotas teñen prohibido o acceso á area e á auga nas zonas oficiais de baño de A Freixa I e A Freixa II, aínda que se permite a súa presenza nos chiringuitos e paseos anexos. No resto do río Tea, como A Moscadeira, San Roque ou as inmediacións de Fozara, si se permite a presenza de cans.
