O Pleno do Concello de Ponteareas deu luz verde hoxe á proposta da Mesa de Contratación para continuar coa tramitación do novo contrato de concesión do servizo do ciclo integral da auga. Este proxecto estratéxico representa o maior investimento en infraestruturas hidráulicas da historia do municipio.
A proposta inclúe a aceptación da clasificación das ofertas e a designación de FCC Aqualia, S.A. como empresa adxudicataria, tras obter a maior puntuación (94,9 puntos). A compañía dispón agora do prazo legal para presentar a documentación requirida, tras o cal os servizos municipais realizarán as comprobacións pertinentes antes da adxudicación definitiva polo Pleno.
Este contrato, que mobilizará 32,5 millóns de euros, suporá unha transformación nas obras de abastecemento e saneamento. As actuacións previstas inclúen a ampliación de redes existentes, a renovación de infraestruturas obsoletas, a modernización do sistema hidráulico e a mellora da eficiencia mediante novas tecnoloxías de control e detección de fugas.
O obxectivo principal é dotar a Ponteareas dunha rede integral de saneamento que chegue a todas as parroquias, garantindo que en dous anos todos os núcleos de poboación dispoñan deste servizo básico. Trátase de saldar unha débeda histórica coa veciñanza, especialmente no rural.
“"Hoxe damos un paso decisivo para facer realidade un dos proxectos máis importantes para o futuro do noso municipio. Cumpriremos un obxectivo histórico, como é dotar a Ponteareas dunha rede integral de saneamento que chegue a todas as parroquias."
“"O obxectivo do concello é que ningún veciño ou veciña quede sen este servizo básico polo feito de vivir no rural. Estamos construíndo o Ponteareas do futuro con investimentos que mellorarán a calidade de vida de toda a veciñanza."
A alcaldesa tamén destacou que o proxecto resolve unha débeda histórica co rural, protexe o medio ambiente, moderniza o ciclo integral da auga e garante un servizo público eficiente. Lembrou o voto en contra de PSOE, BNG e Ponteareas en Común a este expediente.
O Concello subliña que o servizo manterá a súa titularidade pública e municipal, coas competencias de planificación, control e supervisión. O novo contrato busca garantir un servizo moderno, eficiente e sostible, permitindo investimentos inasumibles unicamente con recursos municipais.
Co acordo adoptado, o expediente entra na súa fase final. Unha vez validada a documentación por parte de FCC Aqualia, elevarase ao Pleno a proposta de adxudicación definitiva, culminando un procedemento que transformará as infraestruturas hidráulicas de Ponteareas.
