A Xunta de Galicia comunicou ao Concello de Ponteareas a licitación, por un importe de 641.587,26 euros, da contratación dos servizos de redacción do proxecto básico e de execución e dirección de obra de construción do novo centro de saúde da localidade.
A alcaldesa, Nava Castro, cualificou a noticia como "un paso decisivo para facer realidade unha infraestrutura moi demandada polos nosos veciños e veciñas". Destacou o compromiso da Xunta e do presidente Alfonso Rueda coa mellora da sanidade pública e agradeceu a lealdade institucional do Concello ao ceder a parcela necesaria.
O novo centro de saúde, cun investimento previsto de 8,6 millóns de euros e un edificio de máis de 5.700 metros cadrados, permitirá ofrecer unha atención sanitaria moderna e adaptada ás necesidades actuais e futuras. Substituirá as actuais instalacións, que xa quedaron pequenas tras máis de trinta e cinco anos de servizo.
Ademais, o novo espazo incorporará novos servizos e mellorará a atención en medicina de familia, pediatría, saúde mental, fisioterapia, atención á muller, o Punto de Atención Continuada, a base do 061 e a Unidade de Condutas Aditivas, entre outros.
A rexedora mostrou a súa "enorme satisfacción" polo avance do proxecto, que mellorará a calidade de vida dos veciños e demostra que "cando as administracións colaboran con responsabilidade e pensando no interese xeral, os proxectos fanse realidade".
Desde o Concello sinalan que se continuará traballando para axilizar as vindeiras fases e que Ponteareas poida contar canto antes cun centro de saúde de referencia.
