O encontro serviu para destacar as oportunidades laborais e formativas do sector e contribuír a afrontar o reto do relevo xeracional. A apertura institucional contou coa participación da conselleira do Mar, Marta Villaverde Acuña; do presidente do GALP Ría de Arousa, Miguel Ángel Iglesias Romero; da directora xeral de Formación Profesional, María Eugenia Pérez Fernández; e da directora xeral de Desenvolvemento Pesqueiro, Ángeles Vázquez Suárez. A mesa estivo moderada pola xerente do GALP Ría de Arousa, Rosa Carballo Martínez.
Durante a xornada, expuxéronse datos que sinalan que só o 26,5% das 33.174 persoas afiliadas ao Réxime Especial do Mar tiñan menos de 40 anos en 2025. Tamén se puxo de relevo a necesidade de mellorar a conexión entre a formación e a actividade profesional, facilitando o contacto entre estudantes e empresas. A acuicultura, a innovación tecnolóxica e a diversificación produtiva amosáronse como ámbitos con potencial, xunto coa pesca extractiva.
Ao longo do proxecto, desenvolvéronse actividades en 25 centros educativos, nas que participaron 998 alumnos e alumnas. As accións incluíron visitas a centros de formación, instalacións vinculadas á actividade marítimo-pesqueira, oito saídas en embarcación e un campamento na illa de Ons. Ademais, celebrouse unha xornada informativa sobre Formación Profesional Dual en Ribeira, con 76 asistentes e 20 relatores.
O proxecto tamén elaborou oito pezas audiovisuais temáticas e un vídeo promocional, e estivo presente na feira EDUGAL en Pontevedra. A xornada de clausura incluíu unha mesa redonda sobre boas prácticas para favorecer o relevo xeracional e rematou coa presentación do vídeo promocional e unha degustación de produtos do mar.
«Relevo xeracional: o futuro do mar» é unha iniciativa de cooperación dos oito Grupos de Acción Local do Sector Pesqueiro (GALP) de Galicia, coordinada polo GALP Ría de Arousa e desenvolvida en colaboración co GALP vasco Itsas Garapen Elkartea. Conta co financiamento da Consellería do Mar, a través do Fondo Europeo Marítimo, de Pesca e de Acuicultura (FEMPA).
