A deputada de Medio Rural, Cristina Capelán, visitou este martes a comunidade para coñecer de primeira man os avances e investimentos financiados pola institución provincial. Esta achega enmárcase dentro da liña de subvencións a entidades agrarias, labregas, forestais e de desenvolvemento rural, que este ano ascende a 224.825 euros e beneficia a 38 entidades.

O proxecto subvencionado permitirá mellorar as instalacións gandeiras e adquirir novo equipamento esencial para a gandería rexenerativa e o silvopastoreo. Entre os elementos previstos figuran carpas para o gando e a forraxe, colares virtuais con GPS para crear valados virtuais, cámaras de vixilancia, contedores de alimento e mangas de manexo para facilitar o coidado e saneamento dos animais.

A deputada tamén destacou que estes investimentos contribúen a unha transición cara a un modelo de monte máis diverso, que integra a gandería extensiva, a prevención de lumes, a biodiversidade e a produción de alimentos de calidade, afastándose dun enfoque case exclusivo na explotación madeireira. A comunidade de montes de Leiro aposta pola gandería rexenerativa como estratexia para previr incendios forestais, fomentar a biodiversidade, mellorar o benestar animal e dinamizar o medio rural.

Segundo a memoria do proxecto, o gando xoga un papel fundamental na prevención de lumes ao consumir a vexetación baixa e as matogueiras, reducindo así o material inflamable. Esta iniciativa beneficia directamente ás 219 persoas comuneiras rexistradas, e estímase que o seu impacto positivo se estende a toda a parroquia de Leiro, con preto de 1.000 habitantes, e ao concello de Rianxo e a súa área de influencia.

Ademais, Capelán subliñou a dimensión colaborativa destes proxectos, xa que a comunidade de montes de Leiro traballa activamente con outras comunidades de Rianxo e municipios veciños como Dodro e Boiro, a través da Plataforma pola defensa do monte, compartindo experiencias, coñecementos, materiais e equipamentos.