O municipio de Ribeira contará proximamente cun novo e moderno parque canino situado no lugar de Cubeliños. A Xunta de Galicia, a través da Consellería de Medio Ambiente e Cambio Climático, destinará máis de 60.000 euros para facer realidade este proxecto, que busca ofrecer un espazo seguro e adaptado ás necesidades dos animais de compañía e das súas familias.
O acordo foi formalizado mediante a sinatura dun protocolo de colaboración entre a conselleira Ángeles Vázquez e a alcaldesa, María Sampedro. Segundo o pactado, a administración autonómica asumirá o custo total da construción, incluíndo a licitación e execución das obras. Pola súa banda, o Concello achegará os terreos necesarios, libres de cargas, e encargarase do mantemento posterior das instalacións.
O futuro parque ocupará unha superficie de 1.950 metros cadrados e estará equipado con portas de dobre acceso, fontes de auga adaptadas para cans, dispensadores de bolsas hixiénicas e papeleiras. Tamén disporá de bancos para os usuarios, zonas de vexetación e sombra, boa iluminación e unha área de xogo con obstáculos e ramplas deseñada para o exercicio e a socialización dos animais.
“"A importancia cada vez maior que ten para a cidadanía poder dispoñer nos seus propios municipios deste tipo de espazos dotacionais, ben equipados, amplos e deseñados para favorecer o exercicio, o xogo e a socialización dos seus animais de compañía, con liberdade e sen necesidade de correas ou bozos."
A conselleira Ángeles Vázquez, acompañada pola delegada territorial da Xunta na Coruña, Belén do Campo, destacou a relevancia destes espazos para a cidadanía. Ribeira, que conta con 7.323 cans inscritos no Rexistro galego de identificación de animais de compañía (Regiac), convértese así no sexto municipio galego en acadar este compromiso de colaboración coa Xunta, dentro dunha iniciativa posta en marcha o ano pasado para promover parques caninos nas grandes cidades galegas.
