Portos de Galicia vai renovar as escaleiras e varandas de uso profesional no peirao de Aguiño, situado no municipio coruñés de Ribeira. A presidenta do ente público, Natalia Botana, trasladou esta decisión ao patrón maior da confraría de pescadores da localidade, José Antonio Santamaría, durante unha reunión celebrada na sede do organismo en Santiago.
Botana informou que estas melloras forman parte das tarefas de mantemento e conservación que Portos de Galicia realiza de forma habitual nas súas infraestruturas. Estas actuacións súmanse ás recentes renovacións de defensas e varandas que xa se executaron en fases anteriores.
Durante o encontro, tamén se abordaron as prioridades de investimento en novas infraestruturas para o porto de Aguiño a medio prazo. A presidenta de Portos sinalou que o organismo buscará alternativas para a ordenación da flota na lámina de auga e analizará a posibilidade de habilitar espazos de almacenaxe para os mariñeiros que traballan neste peirao.
