O evento contará con máis de 40 actividades, entre as que se inclúen presentacións de libros, charlas, unha feira editorial, entrega de premios, cómic e xogos de rol. A praza da Inmaculada será o escenario principal para catro partidas de rol, e en caso de choiva, trasladaranse ao interior do edificio dos antigos xulgados.
Ofreceranse dous tipos de xogos de rol: tradicional e de roles ocultos. Nos xogos tradicionais, os participantes crean unha personaxe ficticia e interactúan nun mundo guiado por un narrador, o máster. Para o público adulto, haberá unha partida titulada "Noite de póker", ambientada nun comando de Estados Unidos. Para o público infantil, a partida será "Gatiños máxicos", unha historia imaxinaria con animais.
Ademais, a TuidCon HispaCon organizará dous xogos de roles ocultos, deseñados para ser máis inmersivos e que os xogadores vivan as experiencias en primeira persoa. Unha destas partidas, "Primeiro viñeron", estará ambientada na Noite dos Cristais Rotos na Alemaña de 1938. A outra partida de rol oculto, "O enigma doutro mundo", desenvolverase nunha base soviética na Antártida.
Para poder participar nestas partidas, é necesario inscribirse a través do correo electrónico rol_tuidcon@proton.me, xa que as prazas dispoñibles son limitadas.
