O edificio municipal da praza da Inmaculada será o escenario deste encontro, que se celebrará dende o venres 9 até o luns 12 de outubro. O evento presentará un mercado vivo de creatividade, produto local e cultura.
A inauguración terá lugar o venres 9 ás 17:30 h coa presenza de representantes institucionais dos Grupos de Desenvolvemento Rural (GDR) socios do proxecto, así como autoridades municipais, provinciais, autonómicas e nacionais. Na primeira xornada, ás 19:00 h, haberá unha actuación musical de Faía Díaz e Xan Campos. O Espazo Efémero poderá visitarse esa tarde dende as 18:30 ás 21:00 h.
Durante os catro días, dezaoito postos ofrecerán produtos de artesanía, xoiería, moda e agroalimentación. Os asistentes poderán atopar meles locais, viños de autor, xoiaría contemporánea, cerámica, arranxos florais e doces sen glute, entre outras propostas.
Ademais da venda directa, cada xornada incluirá obradoiros demostrativos e concertos en directo, fusionando tradición e innovación. O proxecto de cooperación Leader interterritorial está impulsado polos GDR Galicia Suroeste Eurural, Limia-Arnoia e Ulla Tambre Mandeo, cofinanciado pola Unión Europea e conta coa colaboración do Concello de Tui.
O programa detalla horarios e actividades para cada día. O venres 9, ademais da presentación e música, haberá degustación de viño galego. O sábado 10 e o domingo 11, os horarios de visita serán de 11:00 a 14:00 h e de 16:00 a 21:00 h, con múltiples obradoiros e música en directo a cargo de Abril o sábado e Terreiras o domingo. O luns 12, último día, o horario será o mesmo, con concertos de The Swinging Flamingos e diversos obradoiros.
