O xurado de Vilas en Flor realizou a súa visita anual a Tomiño para coñecer os avances no coidado dos espazos verdes e na xestión ambiental. A valoración foi especialmente positiva para proxectos como Cultivando Paisaxes, a campaña Rodéate de Vida e o novo modelo de xestión de residuos que o Concello quere implementar.
Destacouse a colaboración con profesionais especializados en paisaxismo para planificar, coidar e diversificar os xardíns municipais. Este traballo, enmarcado en Cultivando Paisaxes, permite adaptar as plantacións ás características de cada espazo, incorporar unha maior variedade de especies e dar visibilidade aos viveiros locais.
Os novos xardíns das praza do Seixo e da Mina son un exemplo desta liña de actuación. Inspirados na tradición viveirista do municipio, incorporan máis de vinte variedades de plantas, con especies escollidas para reducir o consumo de auga e facer destes lugares contornas máis verdes e agradables.
A campaña municipal Rodéate de Vida tamén espertou un especial interese, especialmente pola organización do reparto de plantas á veciñanza. Abordouse tamén o novo modelo de xestión de residuos, outra proposta valorada positivamente.
Tomiño conta con catro Flores de Honra durante tres anos consecutivos, un recoñecemento ao labor continuado de mellora dos espazos públicos e conservación da paisaxe. O obxectivo é revalidar ou ampliar este número na presente edición.
Vilas en Flor é un programa promovido en Galicia pola Fundación Juana de Vega, a Asociación de Viveiristas do Noroeste (Asvinor) e a Asociación Galega de Empresas de Xardinería (Agaexar). A iniciativa recoñece o traballo dos municipios na conservación do patrimonio vexetal e paisaxístico, a sostibilidade e a implicación cidadá.
