O Concello do Rosal súmase un ano máis á iniciativa de limpeza simultánea de ríos promovida pola Asociación para a Defensa Ecolóxica de Galicia (Adega), enmarcada no Proxecto Ríos. A xornada, que celebra a súa décimo novena edición, ten como obxectivo principal a recollida de lixo nas beiras dos ríos e a concienciación cidadá sobre a importancia de manter limpos estes ecosistemas.
A limpeza no municipio será coordinada pola Asociación Forestal e de Educación Ambiental A Jalleira, en colaboración co Concello e Adega. Os voluntarios e voluntarias centrarán os seus esforzos na limpeza do río Tamuxe. A actividade está programada para comezar ás 10.00 horas, cun punto de encontro fixado no muíño das Aceñas.
A xornada está aberta a todas as persoas interesadas. Para máis información ou para inscribirse, os/as participantes poden enviar un correo electrónico á dirección ajalleira@gmail.com.
