Esta iniciativa xorde no contexto do proceso participativo aberto para definir as novas liñas de bus urbano de Lugo. Durante este proceso, recibíronse diversas suxestións das urbanizacións de Outeiro de Rei, solicitando a extensión do servizo urbano a estas áreas.
Ante estas demandas, a área de Mobilidade formulou unha solución que poida atender as necesidades dos veciños respectando os límites competencionais do servizo de transporte. A proposta, segundo explicou Arroxo, consiste en
“"habilitar unha liña de autobús desde as urbanizacións de Outeiro de Rei ata o límite co termo municipal de Lugo."
Nese punto, os residentes poderán realizar un transbordo cun bus urbano da cidade a través dun sistema coordinado, facilitando así a súa conexión coa rede de transporte público lucense.
O tenente de alcalde sinalou que o elevado número de propostas recibidas desde as urbanizacións fixo posible esta iniciativa. O autobús, que sería xestionado polo Concello de Outeiro de Rei, permitiría aos cidadáns chegar
“"ata a fronteira co termo municipal de Lugo, para que aí se poidan subir ao urbano."
Desde o Goberno local de Lugo, subliñan que o obxectivo desta medida é
mellorar a accesibilidade ao transporte público, favorecer a mobilidade sostible e dar resposta ás necesidades reais da veciñanza.
Ademais, búscase fomentar a cooperación entre os concellos limítrofes para ofrecer un mellor servizo á cidadanía.
