O acordo permitirá aos veciños de Outeiro de Rei beneficiarse dun desconto do 25% na cota de entrada para darse de alta como socios do Club Fluvial de Lugo. Para acceder a esta bonificación, será necesario acreditar o empadroamento no concello.
Ademais, contemplaranse condicións especiais nos cursos de natación organizados polo Club nas súas instalacións de Mosteiro para os empadroados non socios. As tarifas mensuais establecidas son de 25 € por un día á semana e 45 € por dous días para menores de 16 anos, mentres que para adultos serán de 30 € e 60 €, respectivamente. As prazas poderanse reservar a partir do luns nas oficinas do Club en Mosteiro.
O convenio tamén inclúe a realización de cursos doutras modalidades deportivas organizados polo Concello de Outeiro de Rei no centro deportivo de Mosteiro, a prezos económicos para os empadroados. A información detallada sobre estes cursos, prazos e tarifas publicarase proximamente nas canles municipais.
Este acordo terá unha vixencia dun ano, prorrogable automaticamente cada ano. Para máis información, os interesados poden consultar na Casa da Cultura de Outeiro de Rei en horario de mañá ou chamar ao teléfono 982 393 408.
