Unha nova vaga de roubos en turismos na capital lucense mobilizou á Policía Nacional, que iniciou unha investigación para identificar canto antes os autores dos feitos. Os roubos tiveron lugar na madrugada do xoves ao venres nas proximidades das zonas de Albeiros e Garabolos.
Os axentes desprazáronse ao lugar tras recibir o aviso dun cidadán que alertou de ter visto un coche con danos nunha rúa da zona. Ao chegar, as patrullas localizaron polo menos seis turismos con desperfectos, principalmente rotura de lúas, e nos que os delincuentes subtraeron diversos artigos de valor que se atopaban no interior.
A Policía xa contactou cos propietarios dos vehículos afectados para informarlles da situación e para que formalicen as correspondentes denuncias.
Os ladróns romperon as lúas dos coches e subtraeron todos os artigos de valor que atoparon no interior dos mesmos.
O Ministerio do Interior alertou recentemente sobre un novo obxectivo dos ladróns de vehículos a nivel estatal: as balizas V16, obrigatorias para sinalizar incidencias en estrada e que, segundo as autoridades, teñen fácil saída no mercado negro. Este obxecto súmase aos roubos tradicionais de roupa, ferramentas, compoñentes dixitais ou pezas do propio vehículo.
A Policía tamén subliña que o feito de romper ventás ou forzar portas eleva a gravidade do delito a "roubo con forza", que se castiga con penas de un a tres anos de cárcere, significativamente máis que o simple "hurto" que se produce cando se aproveita un descoido do propietario sen necesidade de forzar o vehículo.
Aínda que os roubos en interiores de vehículos son comúns, Lugo destaca por ter unha das cifras máis baixas do país en canto a roubos de vehículos na súa totalidade. De feito, Galicia rexistrou unha diminución do 9,7% nos roubos de coches no último ano.
