Os bens arqueolóxicos, entre os que destacan varios petróglifos, atópanse nunha zona onde se están a realizar cortas de piñeiros con maquinaria pesada, coa intención de plantar eucaliptos posteriormente. Segundo as organizacións, non se están a tomar as medidas de precaución necesarias para protexer estes elementos patrimoniais.

A principal preocupación céntrase nos petróglifos de Parada, sobre cuxa rocha xa se atopan troncos de piñeiros talados. Mariña Patrimonio subliña a ausencia de "medidas de precaución ou protección" durante estas operacións.

As asociacións denuncian que a Dirección Xeral do Patrimonio Cultural ten coñecemento da existencia destes petróglifos dende o ano 2020, cando se confirmou a súa autenticidade. A pesar diso, non foron incluídos nin no visor do Plan Básico Autonómico (PBA) nin no visor de aproveitamentos forestais, o que aumenta o risco de danos ao non constar publicamente a súa localización.

Ademais dos petróglifos, Mariña Patrimonio advirte da presenza doutros bens patrimoniais inéditos para a Dirección Xeral de Patrimonio Cultural na mesma área arqueolóxica. Entre eles, mencionan as Medorras de Parada, unha delas con masa tubular ben definida e conservada, e a outra cos chantos da cámara e do corredor en bo estado. Tamén sinalan a existencia de numerosas penas con petróglifos tipo coviñas e a Medorra das Latas, que conserva chantos da cámara.

Ante o "risco inminente" de danos, as entidades solicitaron ás administracións competentes unha actuación urxente. As súas peticións inclúen a comprobación inmediata dos feitos, a inspección da zona afectada e a adopción de medidas cautelares para evitar a destrución dos bens. Tamén demandan a paralización dos traballos forestais na contorna dos elementos patrimoniais ata que se garanta a súa protección efectiva e a valoración e protección do resto dos bens sinalados.