O goberno local de Lugo saíu ao paso das críticas do BNG sobre unha obra de reparación dunha pista en Muxa, asegurando que a actuación responde á necesidade de solucionar un problema de seguridade que afecta ao transporte escolar. O executivo cualificou as acusacións nacionalistas de "carecer de calquera fundamento" e de ser un intento de "xerar unha polémica artificial" arredor dunha intervención "plenamente xustificada".
O BNG denunciara que o goberno local investía case a metade do orzamento propio para asfaltados na zona rural en actuacións que "benefician directamente os accesos da vivenda da concelleira de Rural", Flor Rubinos. Fronte a isto, o goberno replicou que a concelleira reside "a varios quilómetros" do lugar, polo que a acusación é "falsa".
O Concello lamentou que o BNG recorra a "mentiras" para cuestionar actuacións necesarias que, segundo o goberno, deixaron sen atender cando os nacionalistas estaban no poder. A intervención no camiño que conecta a N-640 con Pedreda e no da igrexa de Santa María de Muxa é descrita como a "resposta a unha demanda real" para "resolver un problema que o anterior goberno deixou sen atender".
O executivo fixo referencia a un escrito presentado o pasado 22 de febreiro pola empresa concesionaria do transporte escolar. Nese documento, a empresa advertía do "mal estado da pista" e expresaba a súa "preocupación polos riscos existentes para a prestación do servizo, solicitando unha actuación urxente" do Concello, petición que non se produciu no seu momento.
Ademais, o goberno local insistiu en que "as obras municipais non se executan en función de onde resida ningún concelleiro, senón atendendo ás necesidades da cidadanía e aos informes e peticións que recibe o Concello". A empresa concesionaria, Autocares Mourenza, sinalou no seu escrito que o estado da vía era "moi deficiente, presentando moitos baches e moi profundos e supoñendo un risco para a seguridade vial e para os vehículos".
O Concello acusou o BNG de "deixar sen atender durante anos as reclamacións da veciñanza".
