O tenente de alcalde do Concello de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, presentaron este martes a cuarta edición do festival Primavera é Danza. Este evento, impulsado polas escolas de danza da cidade, busca achegar esta arte á cidadanía.
“"Renovamos o noso apoio coas escolas de danza para continuar a difundir esta arte e as súas distintas formas, aproveitando as rúas como un gran escenario para as distintas agrupacións."
O festival desenvolverase entre o 22 de abril e o 8 de maio, con actuacións programadas en diferentes puntos da cidade. As exhibicións terán lugar no fondo da Praza Maior e, en caso de choiva, trasladaranse ao soto da Praza de Abastos. Ademais, o Auditorio Municipal Gustavo Freire será o escenario dun gran espectáculo de fusión de estilos o 29 de abril ás 20.00 horas.
Entre as escolas participantes e as súas datas de actuación atópanse Oxeito (22 de abril, 17.00 horas), Victoria Gil Danza & Escena (23 de abril, 18.30 horas), Gravitty (26 de abril, 16.30 horas), Magie Dance (6 de maio, 17.00 horas) e Star Dance (8 de maio, 17.00 horas).
“"Con esta iniciativa a Tenencia de Alcaldía continúa a apoiar á danza, aumentando a nosa aposta, despois de contar cunha programación estable de danza ao longo de todo o ano."
O obxectivo principal do festival é consolidar a danza como unha disciplina cultural estable en Lugo, achegándoa á poboación a través do espazo urbano e da diversidade de estilos e agrupacións locais.
