As Xornadas Nacionais e Internacionais de Enfermaría, que se celebran dende este martes en Lugo baixo o lema 'A ciencia que abraza', congregan a máis de 300 profesionais e estudantes no auditorio da Facultade de Veterinaria do Campus lucense. O evento céntrase no futuro da profesión, a innovación nos coidados e a contribución científica e investigadora da enfermaría.
“"Trátase de achegar unha imaxe actual da enfermaría, como profesión científica, innovadora e comprometida coas persoas."
A innovación constitúe un dos eixes centrais do congreso. Unha mesa redonda titulada Da evidencia á práctica transformadora, que conta coa participación de expertos como José Luis Cobos Serrano, presidente do Consello Internacional de Enfermaría, abordará temas como a medición da complexidade nos coidados e o empoderamento da profesión en países como Brasil.
A directora da Escola de Enfermaría de Lugo, Pilar Penela, tamén fixo fincapé na escaseza de persoal de enfermaría, unha situación que afecta o sistema de saúde. Para mitigar este problema, a escola aumentou as súas prazas de 60 a 85, aínda que a falta de profesionais persiste, en parte debido ás xubilacións.
“"A ratio de enfermeira por paciente en Lugo é probablemente unha das máis altas de Galicia."
Outro punto clave é o debate sobre o futuro da propia Escola de Enfermaría de Lugo e a súa posible integración na estrutura da Universidade de Santiago de Compostela (USC). Penela considera que esta integración sería beneficiosa tanto para o persoal como para o alumnado, xa que actualmente a escola depende do Sergas.
“"Queremos que a escola funcione como un centro máis do campus de Lugo e que non sexa dependente doutro centro da Universidade de Santiago."
A directora amósase optimista ante esta posibilidade, especialmente co novo equipo reitoral da USC, que tomou posesión a semana pasada, o que podería facilitar a consecución deste obxectivo.
