Axentes da Policía Local de Lugo localizaron nas últimas horas unha muller de 86 anos que se atopaba "exausta", visiblemente "débil e desorientada" nunha céntrica rúa da cidade. A anciá comunicou aos axentes que acudiron ao seu auxilio que levaba dous días sen comer con regularidade e sen inxerir a medicación necesaria para a diabetes e a hipertensión que padece.

Segundo a información facilitada pola Policía Local, unha patrulla atopou á muller sentada e apoiada contra unha fachada na Rúa San Roque. A anciá explicou que saíra da súa casa para buscar unha farmacia e conseguir a medicación que precisa para a tensión arterial e a insulina. Ao atopar a farmacia pechada, sentou na rúa e non puido incorporarse, quedando alí á espera de axuda.

Os axentes intentaron contactar coa filla da muller sen éxito. Ante o mal estado da anciá, decidiron chamar a unha ambulancia para o seu traslado ao Hospital Universitario Lucus Augusti (HULA).

A Policía Local recomendou pór os feitos en coñecemento dos Servizos Sociais, ao considerar que a muller non está en condicións de valerse por si mesma e necesita atención e coidados.