A exposición, que forma parte das itinerancias da Cidade da Cultura incluídas na programación da campaña de verán ‘Para gustos, cultura’, fai un percorrido pola evolución destas agrupacións musicais populares galegas dende principios do século XX ata a actualidade.
Ana Isabel Vázquez destacou o impacto económico, social e cultural das orquestras, que mobilizan cada ano a milleiros de persoas e teñen unha forte influencia na música galega actual. Sinalou tamén a importancia de "achegar esta mostra a toda a sociedade para pór en valor o legado cultural das orquestras de verbena na nosa Comunidade".
O proxecto nace dunha exposición previa da Biblioteca de Galicia de 2023 e busca analizar un tema con fonda pegada na sociedade galega, pero pouco estudado academicamente. Lugo é a sétima localidade en acoller esta mostra, que xa pasou por Ponteareas, Baiona, Ribadavia, Guitiriz, Sanxenxo e Viveiro.
A mostra está baseada nun estudo da Universidade de Santiago de Compostela, coordinado por Xaime Fandiño e comisariado por Zósimo López e Henrique Neira. A través de carteis, fotografías e programas de festas, amosa a adaptación da verbena galega a cada época, incorporando ritmos como o charleston ou o jazz, e a súa reinvención fronte á competencia das discotecas e macroconcertos.
O sector afrontou crises e adaptacións dende os anos 90, e a pandemia de 2020 impulsou propostas que reivindican a verbena como parte esencial da identidade cultural galega.
