A Policía Nacional de Lugo detivo recentemente un individuo que levaba meses cometendo roubos en negocios e vehículos na cidade. A súa última acción foi a subtracción de gasoil de depósitos de coches estacionados na vía pública, o que finalmente levou ao seu ingreso en prisión.
Os axentes do grupo de delitos contra o patrimonio sorprenderon o home forzando depósitos de vehículos na zona da Milagrosa coa intención de roubar combustible. Tras unha primeira detención e posta a disposición xudicial, onde quedou en liberdade con cargos, foi sorprendido de novo esa mesma noite cometendo outro roubo de gasoil na Rúa do Valuro, utilizando o mesmo método.
“"As xestións policiais posteriores permitiron relacionar tamén a este home con outros feitos delictivos cometidos na capital, entre eles un furto na zona exterior dos xulgados, en Armando Durán, onde supostamente subtraería obxectos do interior dunha furgoneta dunha empresa de mantemento."
Ademais dos roubos de combustible, a Policía Nacional imputa a este individuo varios furtos en tendas de comestibles do casco histórico e en centros comerciais. Presuntamente, subtraía gran cantidade de artigos de alimentación, centrándose en moitos casos en produtos 'gourmet' de elevado prezo.
O home xa fora arrestado a mediados do pasado mes de marzo por dous roubos en lavanderías autoservizo, onde forzaba os caixetíns das máquinas para levar a recadación. Ante a súa reiteración delictiva, o xulgado de garda decretou o seu ingreso en prisión provisional tras o último arresto.
