A construción dun novo centro de saúde no Sagrado Corazón de Lugo e a urbanización da parcela do antigo colexio, que suma máis de 5.600 m², foron os puntos centrais dun encontro entre o conselleiro de Sanidade, Antonio Gómez Caamaño, e a rexedora municipal, Elena Candia. A directora xeral de Recursos Económicos do Servizo Galego de Saúde, Amparo Pousada, tamén estivo presente na xuntanza celebrada na Casa do Concello.
A Consellería de Sanidade reafirmou o seu compromiso coa posta en marcha desta nova instalación sanitaria, que busca ofrecer á cidadanía unhas dependencias modernas, amplas e de fácil acceso. A futura infraestrutura sanitaria ocupará uns 1.600 m² e estímase un investimento duns cinco millóns de euros. Contará con sete consultas de medicina familiar e comunitaria, outras tantas de enfermería, unha área pediátrica, sala de toma de mostras e espazos para actividades formativas, co obxectivo de dar servizo a preto de 10.000 veciños.
Unha vez que o Concello complete a adquisición dos terreos nos próximos días, iniciaranse os trámites para a súa cesión ao Servizo Galego de Saúde. Posteriormente, o Sergas procederá á licitación da redacción do proxecto construtivo do novo centro.
Durante a reunión, tamén se avaliou o anteproxecto deseñado pola Xunta para optimizar a localización do centro de saúde dentro da parcela, así como os accesos e as posibilidades de desenvolvemento urbanístico do resto do terreo.
Ademais, tratouse o estado das obras de mellora no centro de saúde da Milagrosa, onde a Xunta está a investir 3,2 millóns de euros. Estas reformas, que buscan modernizar a atención primaria na cidade, prevén acadar o seu pleno rendemento este mes de setembro, tras solucionar un reforzo estrutural imprevisto. A reforma dotará o centro de seis consultas de medicina familiar e seis de enfermería, ademais de espazos para docencia, urxencias e toma de mostras.
