Representantes de cámaras de comercio do norte de Portugal, Galicia, Asturias, Cantabria, Burgos, o País Vasco e Nova Aquitania reuníronse para avanzar en liñas de actuación compartidas. A delegación lucense estivo encabezada polo presidente da organización.

Durante a xornada, levouse a cabo unha sesión técnica onde se analizaron os progresos en áreas fundamentais como a conectividade, a capacidade de influencia, a diversificación económica, o emprendemento e a sustentabilidade.

Entre os temas abordados destacaron o impulso ao corredor ferroviario atlántico, o apoio á intermodalidade e conectividade dos portos do Arco Atlántico, e o desenvolvemento de actividades vinculadas ao enoturismo, ocio, natureza e benestar. Tamén se tratou o avance do Corredor do Hidróxeno, a súa incorporación ao Mapa Europeo de Infraestruturas do Hidróxeno e a promoción das enerxías mariñas renovables.

As conclusións desta sesión técnica foron presentadas posteriormente nunha reunión que congregou aos presidentes das cámaras que integran ARCHAM. O foro continuará no Centro Botín cun encontro que reunirá a representantes institucionais e empresariais, nun momento crucial para a macrorrexión no ámbito europeo, buscando reforzar o seu peso económico, industrial e loxístico e avanzar nunha axenda común.