A Vía Mariana Luso Galaica, itinerario de preto de 400 quilómetros que conecta Braga (Portugal) cos santuarios marianos da antiga Gallaecia ata Muxía, continúa o seu desenvolvemento co obxectivo de afianzarse como unha ruta de peregrinación singular. Na súa última asemblea xeral, celebrada en Moraña, a asociación promotora analizou os avances do último ano e definiu as novas liñas de traballo.
Entre os principais obxectivos para esta nova etapa destacan a ampliación da rede de delegados territoriais, o reforzo da sinalización, a mellora das acollidas e o desenvolvemento dunha experiencia máis completa e auténtica para os peregrinos. A entidade destaca que a "gran fortaleza da Vía Mariana reside na súa rede humana de delegados", unha estrutura de voluntariado que ofrece apoio directo ao camiñante e comparte coñecementos do territorio.
Este factor humano, engaden, "converteuse nunha das señas de identidade do proxecto" e é clave tanto na atención a peregrinos individuais como na organización de grandes grupos. Iniciativas como o grupo Mulleres Rurais O Menhir, con entre 80 e 120 participantes, xa completaron a primeira fase do percorrido entre Moraña e Muxía, e prevén retomar o camiño este outono dende Braga. Tamén avanza o Club Vía Láctea, con preto de 40 persoas, que chegará a Muxía en decembro.
Para obter a Mariana, diploma acreditativo final, é necesario completar os preto de 400 quilómetros da ruta, que se pode realizar por etapas sen límite temporal. O punto quilométrico cero atópase en Turismo de Sameiro (Braga), mentres que o diploma recóllese na Oficina Municipal de Turismo de Muxía. A asociación tamén anunciou a incorporación de novos socios colaboradores e agradeceu "a labor de todas as persoas implicadas nas acollidas".
A Asociación Vía Mariana tamén agradeceu o respaldo dos concellos implicados na ruta, que colaboran na limpeza, mantemento e mellora dos camiños. Destaca a instalación de novos paneis informativos turísticos, baseados nun modelo oficial e homoxéneo, que xa se colocaron en municipios como Muxía e A Lama, permitindo a cada municipio promocionar os seus recursos patrimoniais e naturais.
