Fisterra acolleu a visita de Jeff Olson, recoñecido impulsor internacional do uso da bicicleta como medio de transporte e ferramenta de desenvolvemento turístico. Olson, que foi asesor da Casa Branca, impartiu a conferencia "Desde o Gran Canón ao Empire State Trail e ao Camiño de Santiago", destacando a súa experiencia en proxectos como o roteiro do Gran Canón do Colorado e o Empire State Trail de Nova York.
Durante a súa estancia en Galicia, Olson está a coñecer diversos enclaves da comunidade, avaliando as súas oportunidades para o crecemento do cicloturismo. A súa visita tamén se enmarca na súa labor de promoción de Galicia como destino nos Estados Unidos, sendo autor do libro "The Third Mode: Towards a Green Society".
Na súa intervención, o director de Turismo de Galicia, Xosé Manuel Merelles, subliñou a aposta da Xunta por un modelo turístico sustentable, onde o cicloturismo gaña cada vez máis relevancia. Destacou que Galicia é a única rexión europea con dous grandes itinerarios da rede EuroVelo, a EuroVelo 1 e a EuroVelo 3, que finalizan en Cabo Fisterra.
Merelles tamén sinalou o crecente interese pola bicicleta no Camiño de Santiago, con 8.675 peregrinos que xa realizaron a ruta en bicicleta este ano, reflectindo o auxe desta modalidade.
Na conferencia tamén estiveron presentes o alcalde de Fisterra, Luis Insua, xunto a representantes do sector turístico como Pepe Formoso, presidente da Asociación de Profesionais do Turismo de Costa da Morte; Jesús Picallo, vicepresidente do Clúster de Turismo de Galicia; e Julio Castro, director do Parador de Turismo Costa da Morte.
