A actuación, que conta cun investimento total de 285.666,10 euros, foi resolta pola Alcaldía o pasado 2 de outubro tras estudar as cinco ofertas presentadas. O local, de titularidade municipal, recibirá unha posta ao día para adaptalo ás esixencias de accesibilidade e facelo máis cómodo para todos os veciños e veciñas.
O proxecto está incluído no Plan provincial de cooperación ás obras e servizos de competencia municipal (POS+ 2025) da Deputación da Coruña. Ademais, conta con financiamento propio do Concello e cunha importante doazón de 142.644,62 euros de Pull&Bear (Grupo Inditex), procedente da recadación de actividades solidarias do persoal da súa sede central en Narón.
A reforma inclúe a substitución de elementos como rampas, barandas, pavimento, radiadores, sanitarios, falso teito e parte da tabiquería. Tamén se eliminarán desniveis, renovarase o pavimento, redistribuiranse os aseos con novas instalacións de fontanería e saneamento, e cambiarase a carpintería exterior. Inclúese ademais unha nova escaleira vertical ao soto e sinalética para mellorar a accesibilidade.
A intervención completarase coa renovación da instalación eléctrica, luminarias, interruptores, tomas de corrente e aparatos de calefacción. Tamén se instalará un sistema contra incendios, novo mobiliario, renovarase a barra de madeira e pintarase o interior e as portas do centro.
A sinatura do contrato está prevista para esta mesma semana. A empresa adxudicataria terá un prazo dun mes para comezar os traballos, e o prazo de execución previsto é de catro meses a partir dese momento.
