O xornalista e agora director ferrolán Ángel Suanzes presentará a súa primeira obra cinematográfica, Escala un cincuenta mil, no Festival de Cans. Este proxecto documental xorde dun achado casual: unha carpeta que contiña facturas, posavasos e postais da viaxe de noivos dos seus pais no ano 1974. A curiosidade por entender por que se conservan obxectos cotiáns e non románticos foi o punto de partida para unha exploración da memoria familiar e, por extensión, da historia dun país.
O documental recrea a viaxe que os pais do director realizaron nun SEAT 600 por gran parte de España, dende Ferrol ata Valencia e Barcelona. Un percorrido de máis de mil quilómetros sen música nin autoestradas que serve de pano de fondo para analizar a construción dunha relación de parella que apenas se coñecía en profundidade. A cinta convértese así nun retrato da España de 1974.
“"Ela pasa de depender dos seus pais a depender do seu home."
O director establece un paralelismo entre a historia persoal da súa nai e a transición política do país. Nese ano, o ditador cedeu o poder por primeira vez, e as mulleres aínda precisaban da sinatura dun home para realizar calquera xestión. Esta situación reflicte unha España que pasaba de depender dun ditador agonizante a un novo reinado.
A presentación do curto no Festival de Cans ten un significado especial para Suanzes, quen mantén unha estreita relación co certame dende os seus inicios como xornalista na Televisión de Galicia. O director subliña o apoio do festival ao cinema en galego e considérao un espazo fundamental para a cultura audiovisual. A cidade de Ferrol tamén é protagonista neste documental, con localizacións actuais rodadas en lugares como Perlío, mostrando como cambiaron os espazos nos últimos 50 anos.
