A representación galega na próxima Asemblea Estatal do Movemento Sumar estará encabezada por Antón García Tenreiro e Trinidad Palacios Raposo. A delegación, composta por 17 persoas procedentes de distintas comarcas, súmanse suplentes e membros natos como o secretario xeral, Paulo Carlos.
A formación sinalou que a delegación galega acudirá á cita coa intención de "contribuír activamente ao novo tempo político" que se abre en Sumar. Tamén buscarán "apoiar" o liderado da portavoz parlamentaria, Verónica Martínez Barbero. Dende Movemento Sumar Galicia, consideran que esta candidatura representa unha "oportunidade para fortalecer a organización, consolidar unha dirección máis plural e territorializada" e avanzar cara a un proxecto político "útil para a maioría social".
A organización subliñou a relevancia da presenza galega na Asemblea Estatal, cualificándoa como "unha das máis relevantes" do conxunto do partido. Destacan tanto o número de representantes como o papel político que Galicia "está chamada a desempeñar" dentro do espazo político. Movemento Sumar Galicia enfatizou a súa "vontade construtiva, espírito de unidade e o compromiso de contribuír ao reforzo dun espazo político amplo, de esquerda, plurinacional, feminista, democrático e enraizado nos territorios".
A pluralidade territorial da delegación galega foi outro dos aspectos postos en valor. A representación incluirá comarcas como Ferrolterra, A Coruña, Val Miñor, O Morrazo, O Salnés, Noia, Compostela, Vigo, Valdeorras e Pontevedra. Deste xeito, a participación galega na Asemblea Estatal preséntase como unha oportunidade para reforzar a súa presenza no proxecto estatal e defender unha organización máis plural, territorializada e conectada coa realidade galega.
