O Concello de Ares continúa coa mellora das súas infraestruturas municipais. Culminou as tres intervencións previstas no Plan Operativo de Servizos (POS+2025) coa posta en marcha das obras no Camiño da Malata, en Caamouco. Esta actuación complétase coas xa realizadas na rúa María e na rúa Irmáns Bugallo.
O investimento conxunto destas tres actuacións ascendeu a 537.173,74 euros. En concreto, a intervención na rúa María contou cun investimento de 331.564,01 euros, a da rúa Irmáns Bugallo foi de 143.958,95 euros e a renovación do Camiño da Malata supón 61.650,78 euros.
O proxecto no Camiño da Malata céntrase na mellora do viario mediante a renovación da pavimentación cun novo aglomerado asfáltico, ademais da limpeza das marxes e o refinado das cunetas. Esta obra, cun investimento de 61.650,78 euros, foi financiada en parte pola Deputación da Coruña (51.565,19 euros) e polo Concello de Ares (10.185,59 euros).
A concelleira de Urbanismo, Olimpia Marcos, destacou que este vial é moi concorrido pola veciñanza de Redes, xa que dá acceso á igrexa e ao cemiterio, ademais de servir como punto de saída do municipio. Marcos sinalou que esta actuación “permite completar as tres obras incluídas no POS+2025, dando continuidade ao investimento destinado á renovación e mellora das infraestruturas municipais”.
Paralelamente, comezaron as obras de mellora do Campo Municipal de Prados Vellos, incluídas no POS+2026 da Deputación da Coruña, cun investimento total de 379.059,42 euros. O proxecto contempla a renovación completa do céspede sintético, a instalación dunha rede separadora retráctil, unha nova rede de rega, a modernización do sistema de drenaxe e novas luminarias LED.
Deste investimento total, 198.325,66 euros son financiados pola Deputación da Coruña e 180.733,76 euros polo Concello de Ares. A edila de Cultura, Deportes, Turismo e Patrimonio, Alma Barrón, puxo en valor o inicio destas obras, sinalando que “estamos ante unha actuación de gran importancia para o deporte local, xa que permitirá renovar por completo o céspede sintético e mellorar diferentes elementos dunha instalación cun uso moi importante ao longo do ano”.
Alma Barrón engadiu que “o obxectivo é contar cunhas instalacións deportivas máis modernas e funcionais, adaptadas ás necesidades dos clubs e das persoas que practican deporte en Ares”. Pola súa banda, Olimpia Marcos enmarcou esta obra nunha estratexia global de mellora de infraestruturas, sumándose a actuacións recentes no Pavillón Municipal, o Edificio de Prados Vellos e a Nave de Embarcacións do Club de Remo, e á futura construción de vestiarios no Club de Tenis de Redes.
