Os representantes sindicais de Navantia Ferrol, Movemento Alternativo Sindical (MAS) e CIG, que suman maioría no comité de empresa, emitiron un comunicado conxunto esixindo un plan estratéxico que conte coa participación dos traballadores. Alertan de que a falta de investimentos necesarios aboca os estaleiros da ría de Ferrol a unha situación de "decadencia".
Os sindicatos critican a actitude da dirección de Navantia, que se nega a negociar un plan de futuro alegando que non existe obriga legal, máis aló das imposicións normativas. Subliñan a súa "preocupación polo futuro da compañía" ante a falta de diálogo.
Entre as principais carencias sinaladas atópase o "silencio absoluto" respecto aos investimentos requiridos para a modernización dos estaleiros, tanto na área de obra nova como na de reparacións. Consideran imprescindible a construción dun novo dique para obra nova e a mellora das actuais áreas de reparación.
Ademais, reclaman melloras concretas en medios de elevación, maquinaria de taller, novas cabinas de pintura e optimización dos sistemas de movemento interior de grandes pezas. Tamén demandan a ampliación do parque de chapas, máquinas de corte e curvado de tubos, así como a creación dun equipo de I+D+i enfocado na eficiencia enerxética, explorando tecnoloxías como o hidróxeno, combustibles sintéticos ou a biomasa.
En canto ao persoal, os sindicatos advirten dun grave problema de man de obra se non se implementa un plan "serio e eficaz" de formación e emprego. Denuncian que, coa práctica totalidade da produción (case un 80%) subcontratada, Navantia corre o risco de deslocalización industrial e, o que é máis grave, de perder o control e o coñecemento estratéxico sobre os seus propios produtos.
Critican tamén a falta de concreción da iniciativa "Navantia Academy" e esixen acordos "reais" coas universidades públicas, sentenciando: "Menos propaganda e máis feitos".
O comunicado conclúe cun chamamento á acción, afirmando que "Se queremos seguir sendo unha referencia mundial na construción naval e optar a contratos internacionais, debemos actuar. Xa!".
