A conselleira de Vivenda e Planificación de Infraestruturas, María M. Allegue, xunto coa delegada territorial da Xunta en Ferrol, Martina Aneiros, supervisou o inicio dos traballos no concello de Narón. A actuación céntrase na entreplanta dun inmoble de titularidade autonómica, situado na rúa Ponte Pielas, en Freixeiro, que será adaptado para albergar 14 novas vivendas públicas destinadas á compra.
O investimento para esta obra ascende a 1,6 millóns de euros. Os traballos, que xa se atopan en execución, teñen un prazo de finalización de 12 meses. A conselleira destacou a importancia de axilizar o proceso para que as vivendas sexan unha realidade canto antes.
Allegue enmarcou esta iniciativa dentro das políticas da Xunta para ampliar a oferta de vivenda pública, aproveitando a modificación normativa que permite a conversión de locais en vivendas. Deste xeito, espazos que estaban previstos para oficinas e permanecían sen actividade serán agora fogares. As 14 vivendas serán adxudicadas a persoas inscritas como demandantes de vivenda no concello.
O proxecto destaca pola súa calidade, contemplando vivendas maioritariamente de tres dormitorios, ademais de dúas tipo loft. Serán fogares deseñados para ser accesibles, luminosos e eficientes enerxeticamente.
Ademais, a conselleira sinalou que a Xunta está a avanzar na licitación doutras 91 vivendas de promoción pública que se construiran en dúas parcelas cedidas polo Concello de Narón.
Por outra banda, Allegue tamén fixo unha reclamación ao Goberno central para a cesión das máis de 2.500 vivendas baleiras que a Sareb posúe en Galicia, co obxectivo de incorporalas ao parque público residencial da comunidade. Criticou que o Goberno central "ten bloqueadas" estas vivendas e instou a que se "deixe de experimentos" e se proceda á súa cesión.
