O municipio de Narón será un dos escenarios da oitava edición do Festival Internacional Entes Animados, que se celebra na comarca de Ferrol dende o 12 ata o 27 de setembro. Este evento, que reúne compañías de Reino Unido, Portugal, Arxentina, Brasil e Dinamarca, busca descentralizar a cultura e achegala á zona rural.
A programación en Narón inclúe un total de seis funcións repartidas por diferentes parroquias e centros cívicos. A primeira cita será o venres 18 de setembro, ás 19:00 horas, no Centro Cívico San Xiao, coa compañía británica Drew Colby e o seu espectáculo “Quen é o señor sombra?”. Ao día seguinte, sábado 19, o local social "A Pombiña" de Pedroso acollerá, ás 13:00 horas, á compañía portuguesa Historioscopio Teatro coa proposta “A Galinha dos Pitinhos de Ouro”.
O domingo 20 de setembro, a artista arxentina Valeria Guglietti presentará no Centro Cívico e Social de San Mateo, ás 19:00 horas, o espectáculo “Non toquen as miñas mans”. Na recta final, o venres 25 de setembro, a compañía brasileira Heliodora e Fabio Superbi actuará no Centro Cívico de Doso, ás 19:00 horas, coa obra “Barbacena”.
O festival continuará o sábado 26 de setembro no Centro Cívico e Social de Sedes, ás 19:00 horas, coa actuación da compañía brasileira Habib e Valeria e o seu espectáculo “O burro errante”. A clausura en Narón será o domingo 27 de setembro no Local Social O Val, ás 19:00 horas, coa compañía danesa Alex Barti Show.
O certame, que conta coa organización conxunta dos concellos participantes e a dirección artística da Asociación Cultural Titerario, presentouse na Casa da Cultura de Neda. O director do festival, Plamen Dipchikov, e representantes institucionais destacaron a colaboración entre municipios para traer artistas de primeiro nivel á comarca.
