Tras varias semanas de relativa calma logo do fin da tempada na Segunda División, o Valdetires Ferrol activou a súa axenda de fichaxes e renovacións. A principal novidade é o regreso da capitá Carol Senra, quen volverá vestir a camiseta verde despois de ter que deixar o equipo por motivos laborais.
A esta boa nova súmaselle a renovación de Irene Cela, outra das xogadoras fundamentais do equipo. Todo indica que o banquillo seguirá baixo a dirección de Manu Lombardía, aínda que aínda quedan detalles pendentes para selar a súa continuidade e a do resto do corpo técnico.
Non todo foron boas noticias, xa que tres xogadoras non continuarán no club. Leti Rojo, Patri Corral e Giselle Tais deixan o equipo verde tras non chegar a un acordo para a súa continuidade. Leti Rojo, que defendera a portería ferrolá durante dúas tempadas, é quen máis tempo levaba no club. Patri Corral, na súa segunda etapa, incorporouse o verán pasado, mentres que Giselle Tais estivo apenas media tempada no conxunto de Esteiro.
O club ferrolán anunciou que nos próximos días desvelará outras renovacións xa pechadas e tamén as novas incorporacións que se sumarán ao proxecto.
