A chegada do buque, prevista para este mércores e xoves, supón un exame para a infraestrutura portuaria. Un equipo de 45 profesionais, entre consignatarios, estibadores e persoal de servizos portuarios, coordinará o desembarco dos automóbiles mediante o sistema ro-ro, que permite a saída dos vehículos rodando directamente desde o interior da embarcación ata a campa.
Os vehículos serán trasladados a unha explanada de case 20.000 metros cadrados en Caneliñas. Este espazo funcionará como lanzadeira loxística antes de que a multinacional proceda á súa distribución cara á rede de concesionarios mediante camións portavehículos.
A Autoridade Portuaria de Ferrol sinala que esta proba é fundamental para comprobar os tempos de descarga, a mobilidade interna e a sincronización necesaria para converter a ría nun nodo de distribución para o norte peninsular. A operativa busca garantir que a infraestrutura poida soportar as esixencias do modelo just-in-time, vital para a industria da automoción.
