A Xunta de Goberno do Concello de Cedeira aprobou a adxudicación das obras de mellora do sistema de saneamento na rúa Moeche, no casco urbano, cun orzamento de 88.809,97 euros (IVE incluído). A empresa contratada terá un prazo de dous meses para executar a intervención, que busca pór fin aos problemas de anegamentos que se producen nesta rúa durante episodios de choivas intensas.
Esta actuación, financiada polo Fondo de Compensación Ambiental da Xunta de Galicia, cuxos fondos proceden do canon dos parques eólicos, centrarase na implantación de redes separativas para as augas residuais e as pluviais. Incluirase tamén a recollida e conexión de todas as baixantes de auga de choiva que actualmente verten directamente ás beirarrúas, ademais da reposición dos firmes danados.
Actualmente, a rúa Moeche dispón dunha rede unitaria de sumidoiros que conecta tanto as augas residuais dos edificios como as pluviais recollidas polas baixantes e sumidoiros. A esta mesma rede tamén se conecta parte da recollida de augas pluviais doutras rúas perpendiculares. Esta configuración provoca atascamentos e un funcionamento deficiente do sistema en épocas de fortes precipitacións.
Ademais, parte dos pozos existentes atópanse nun estado de conservación precario, con conexións executadas de forma deficiente. Coexisten colectores antigos de formigón con conexións máis recentes de PVC e polietileno, o que agrava os problemas de funcionamento da rede actual.
