Esta iniciativa, que tivo lugar ante representantes das principais sociedades de clasificación do sector offshore como Bureau Veritas, DNV e Lloyds Register, busca optimizar a fase de inspección final das grandes unidades.
A funcionalidade do dron é o resultado dun proxecto desenvolvido no marco dun acordo de colaboración entre Navantia Seanergies e a Asociación de Investigación e Cooperación Industrial de Andalucía (Aicia), a través do seu Grupo de Investigación de Robótica, Visión e Control (GRVC), vinculado á Escola Técnica Superior de Enxeñaría da Universidade de Sevilla.
Durante a xornada de demostración, as imaxes capturadas polo dron foron proxectadas en tempo real nunha pantalla no estaleiro, permitindo aos asistentes observar con detalle a estrutura tipo jacket. As capacidades de zoom, tanto óptico (ata x40) como dixital (ata x80), facilitaron a detección e localización precisa de posibles defectos, confirmando que un zoom x5 equivale á capacidade visual dun operario experto segundo a normativa vixente.
“"O sistema achegará unha maior eficiencia e seguridade ao proceso de inspección final de unidades offshore de grandes dimensións con clientes e sociedades de clasificación."
Esta colaboración dá continuidade a proxectos anteriores entre ambas as entidades, como ePark+, centrado no desenvolvemento de solucións para a inspección autónoma en parques eólicos mariños. Os plans futuros inclúen a capacitación do estaleiro de Fene no uso desta tecnoloxía para consolidar a súa integración progresiva nos procesos de inspección industrial.
A iniciativa enmárcase no Navantia Seanergies Coex Green Energies (Centro de Excelencia de Navantia Seanergies), reforzando o seu compromiso coa innovación tecnolóxica aplicada á industria offshore e contribuíndo á transformación, modernización e dixitalización do estaleiro para incrementar a eficiencia e a calidade dos seus produtos.
