O alcalde de Cedeira, Pablo Diego Moreda Gil, e a primeira tenente de alcalde, María José Pernas Díaz, reuníronse coa presidenta de Portos de Galicia, Natalia Botana, para consensuar a proposta definitiva de reversión ao Estado dos terreos innecesarios para a actividade portuaria. O Concello solicitara en outubro de 2021 a declaración de innecesariedade da franxa litoral que coincide co Paseo da Mariña e que abrangue 4.830m2.
O Paseo da Mariña pasará a mans da Administración Xeral do Estado e logo será cedido ao Concello de Cedeira. A franxa afectada abrangue desde a praza da Marieta ata a Ponte Nova e os xardíns que seguen a liña da costa cara ao Camiño Area Longa. Trátase de zonas axardinadas e alonxadas da actividade portuaria, cuxo coidado e mantemento xa realiza o Concello.
A actual posesión destes terreos por parte de Portos obriga ao Concello a pagar taxas por usos privados, como as terrazas de hostalería, ou públicos, como a celebración de mercadillos ou festas. O alcalde destacou que este acordo culmina unha longa tramitación e permitirá ao Concello facer uso destes espazos como do resto da zona urbana.
Na mesma xuntanza, os responsables municipais insistiron na demanda de que a zona de Portos na localidade conte coa correspondente instalación de saneamento conectada á rede municipal, para evitar vertidos ao mar que poderían afectar á calidade da auga da ría e, polo tanto, ás actividades pesqueiras e marisqueiras. O alcalde lembrou que o Concello leva once anos traballando na mellora do sistema de saneamento e que esta reclamación presentouse en repetidas ocasións.
Ademais, o Concello reiterou a demanda dun porto deportivo en Cedeira con entre 60 e 80 amarres, un proxecto máis razoable que o de 400 amarres anunciado en 2004 por Alberto Núñez Feijóo cando era conselleiro de Política Territorial. No encontro tamén se falou da zona abrigada onde poderían instalarse os pantaláns.
