As sesións formativas da campaña municipal de biorresiduos en Ares concluíron na Casa Rectoral, coa participación activa da veciñanza e de profesionais do sector hostaleiro local. O obxectivo foi sumar ideas, trucos e hábitos sostibles na cociña para reducir o desperdicio de alimentos.
Durante os obradoiros, os asistentes recibiron consellos prácticos e receitas de aproveitamento para maximizar o uso dos alimentos, mellorar a conservación de produtos perecedoiros e evitar que comida en bo estado acabe no lixo de forma innecesaria. Esta aprendizaxe é aplicable tanto nos fogares como nos establecementos hostaleiros da vila.
Esta iniciativa súmase a outras actividades impulsadas polo Concello de Ares xunto á cidadanía e á hostalaría local, como DegustAres, MercAres, os Showcookings ou o traballo cos Grandes Produtores, co fin de estender o uso do colector marrón e fortalecer a aposta colectiva pola prevención de residuos, a economía circular e o consumo responsable.
O proxecto enmárcase na estratexia municipal de mellora da xestión dos residuos e conta co cofinanciamento da Unión Europea a través do programa Galicia Feder 2021-2027.
