A festa, organizada polo Concello de Ares a través da súa Concellaría de Cultura, despregou dende as 17:00 horas unha ampla programación infantil e familiar. As actividades incluíron a tradicional castañeira, con degustación de castañas quentes, o túnel do terror, camas elásticas, música ambiente e un divertido photocall da S.C. O Tilo.
O concurso de cabazas foi un dos puntos culminantes, destacando a creatividade e imaxinación dos participantes. Ademais, realizáronse obradoiros creativos onde os máis pequenos elaboraron imáns terroríficos, chapas personalizadas e experimentaron coa caracterización de feridas de fantasía.
Deste xeito, Ares reafirma a súa aposta por combinar a dinamización lúdica coas tradicións propias destas datas, brindando un punto de encontro acolledor para gozar en comunidade dunha das festas máis agardadas polos máis pequenos.
Dende o departamento de Cultura agradeceron a participación das familias asistentes, así como o traballo e a implicación da S.C. O Tilo e de Protección Civil de Ares no desenvolvemento do evento.
